रुपन्देहीको सिद्धार्थनगर नगरपालिकामा १ करोड ६० लाखको अनियमितता

रुपन्देही जिल्लाको सिद्धार्थनगर नगरपालिकामा १ करोड ६० लाख ६८ हजार ७ सय ३८ रुपैयाँको अनियमितता भएको छ भने प्रमाण तथा कागजात पेश नै नगरेर १४ लाख ५४ हजार ५ सय ८९ रुपैयाँ खर्च गरेको छ ।

महालेखा परीक्षकको लेखापरीक्षण प्रतिवेदन अनुसार अघिल्लो वर्षको बेरुजुबाट १५ करोड ५३ लाख सम्परीक्षण भएपछि हाल कुल अद्यावधिक बेरुजु ७७ करोड ७ लाख २३ हजार रुपैयाँ पुगेको छ।

नगरपालिकाको २ अर्ब ५८ करोड रुपैयाँको कुल आय-व्यय परीक्षण गर्दा कानुन र खरिद नियमावलीको गम्भीर उल्लङ्घन भएको पाइएको छ।

सार्वजनिक खरिद ऐनको धज्जी उडाउँदै प्रतिस्पर्धा सीमित गर्न दातृ निकायको निर्देशिका देखाएर ५ थान डेल ल्यापटप र २ थान अन्य ल्यापटप गरी १९ लाख ५२ हजार रुपैयाँका महँगा उपकरणहरू सोझै खरिद गरिएको छ।

त्यस्तै, स्थानीय सरकार सञ्चालन ऐन विपरीत कम्प्युटर अपरेटर, अनमी र ल्याब असिस्टेन्टजस्ता पदमा कानुन मिचेर १२ जना करार कर्मचारीलाई ५९ लाख ६४ हजार रुपैयाँ तलब भत्ता बाँडिएको छ। समग्रमा विभिन्न पदमा ४३ जना करार कर्मचारी राखेर २ करोड ३३ हजार रुपैयाँ खर्च गरिएको छ।

वडा नं. ४ मा क्रिकेट प्रतियोगिता सञ्चालनका लागि ४ लाख रुपैयाँको मात्र बजेट सीमा स्वीकृत भएकोमा नियम मिचेर ५ लाख रुपैयाँ लागत अनुमान तयार गरी सोहीबमोजिम खर्च भुक्तानी गरिएको छ।

संघीय सरकारको जिम्मेवारीभित्र पर्ने कोलेनका रूपन्देहीको सभाहल निर्माणका लागि नगरपालिकाको विविध खाताबाट ८ लाख ७० हजार रुपैयाँ सहयोगको नाममा दुरुपयोग गरिएको छ। हिमाली सामुदायिक सेवा केन्द्रको १५औँ साधारण सभा र अधिवेशन खर्चका लागि वडा कार्यालयहरूको सिफारिसमा ६४ हजार ९५० रुपैयाँ गैरकानुनी रूपमा भुक्तानी दिइएको छ।

सशर्त अनुदानतर्फ विपन्न लक्षित छात्रवृत्ति र स्यानिटरी प्याडका लागि आएको १० लाख २ हजार रुपैयाँ सो कार्यक्रममा खर्च नगरी डिजिटल सिकाई सामग्री खरिदमा लगाइएको छ। शिक्षा तथा परीक्षा सञ्चालनजस्ता शीर्षकमा खर्च गर्नुपर्ने रकम प्रअ बैठक र अनुगमनका नाममा ५२ लाख १० हजार रुपैयाँ फरक शीर्षकमा उडाइएको छ।

त्यति मात्र होइन, आर्थिक वर्षको अन्तिम दिन हतार-हतार कार्यपालिकाको बैठक बसी १६ वटा विभिन्न संघ, संस्था, क्लब र साइकल सिटीका लागि भन्दै ५ लाख ४ हजार रुपैयाँ आर्थिक सहायता बाँडिएको छ। राज्यको स्रोत र सार्वजनिक सम्पत्तिमाथि भएको यो मनपरीले स्थानीय तहमा वित्तीय अनुशासनको खिल्ली उडाएको छ।