छानबिन माग

नेकपाका सांसद युवराज दुलालले त्रिपुरेश्वरमा भएको बस आगजनी घटनाको सत्यतथ्य बाहिर ल्याउन उच्चस्तरीय न्यायिक छानबिन आयोग गठनको माग गरेका छन्। मंगलबार प्रतिनिधिसभा बैठकमा बोल्दै उनले दोषीमाथि कारबाही गर्न र घटनाबारे गृहमन्त्रीले जवाफ दिनुपर्ने बताए।

प्रहरीसँगको विवादमा चालकले आत्महत्याको चेतावनी दिँदा पनि ट्राफिक प्रहरीले विवेक गुमाएको र युवकलाई जोगाउन नसकेको सांसद दुलालको आरोप छ। यो घटना नागरिकको चरम निराशा, बेरोजगारी र युवाको पीडाको अभिव्यक्ति भएको उनले टिप्पणी गरे।

सांसद दुलालले ठूला सवारीको लाइसेन्स लिन साना सवारीको लाइसेन्स अनिवार्य चाहिने झन्झटिलो व्यवस्था सच्याउन सरकारसँग माग गरे। साथै, उनले ट्राफिक प्रहरी र नियमनकारी निकायहरूलाई मर्यादित एवम् अनुशासित बन्न आग्रह गरेका छन्।