यसपटकको गृहमन्त्री घुस्याहा होइन, पुराना नेताहरू समयमै सुध्रिऊन्

‘हाम्रो तर्फबाट कुनै कमी-कमजोरी नहोस् भनेर रातमा सुत्न पनि डर लाग्छ !’ गृहमन्त्री सुधन गुरुङको यो सनसनीपूर्ण र भावुक अभिव्यक्तिले मंगलबार काठमाडौंको कार्यक्रमस्थल एकाएक गरम बन्यो ।

जेनजी सहिद दिवसका अवसरमा आयोजित कार्यक्रममा बोल्दै गृहमन्त्री गुरुङले सहिदको सपना र जनताको भरोसा जोगाउन आफू र सिङ्गो सरकार ज्यान फालेर लागिपरेको दाबी गरे। पुराना दलका नेताहरूलाई कडा चेतावनी दिँदै उनले स्पष्ट पारे कि ३ करोड नेपाली जनताले अनुमोदन गरिसकेको ‘जेनजी आन्दोलन’लाई अब कसैले अपमान गर्ने वा फेर्ने दुस्साहस नगरे हुन्छ।

आफ्नो अडानबाट एक इन्च पनि पछि नहट्ने उद्घोष गर्दै गृहमन्त्रीले भने, ‘हामी राजनीति सिक्न आएका होइनौँ, युवा पुस्तालाई सेवा गर्न आएका हौँ। लक्ष्य पूरा गर्न जस्तोसुकै चुनौती वा गोलीको सामना गर्न पनि म तयार छु !’ मन्त्रीको कुर्सीलाई सत्ता र शक्तिको मादकताका रूपमा नलिएको बताउँदै उनले समयमै सुध्रिन पुराना नेताहरूलाई खबरदारी गरे।

सुरक्षा निकायलाई उच्च मनोबलका साथ काम गर्न आह्वान गर्दै गृहमन्त्री गुरुङले सबै प्रहरी र सुरक्षाकर्मीलाई आश्वस्त पारे, ‘यसपटकको गृहमन्त्री ‘घुस्याहा’ छैन! तपाईँहरूको साथमा म सधैं चट्टानझैँ उभिनेछु ।’

सहिदको सपना साकार पार्न र जनताको विश्वास जोगाउन कुनै कसर बाँकी नराख्ने गृहमन्त्रीको यो आक्रामक रूपले अहिले राजनीतिक वृत्तमा ठूलो हलचल पैदा गरिदिएको छ।