ललितपुरमा चाडपर्व लक्षित विशेष सुरक्षा योजना लागू

चाडपर्वलाई सुरक्षित र व्यवस्थित बनाउन जिल्ला प्रहरी परिसर ललितपुरले विशेष सुरक्षा योजना लागू गरेको छ। सम्भावित आपराधिक गतिविधि नियन्त्रण गर्न दैनिक १,१५१ जना र कमाण्ड फोर्ससहित कुल १,३४१ प्रहरी जनशक्ति परिचालन गरिएको एसपी गौतम मिश्रले जानकारी दिनुभयो।

विशेष सुरक्षा योजनाअन्तर्गत बैंक, वित्तीय संस्था, सुन पसल, सपिङ कम्प्लेक्स र बसपार्क जस्ता भीडभाड हुने स्थानलाई प्राथमिकतामा राखिएको छ। २४ वटा मुख्य स्थानमा २४ सै घण्टा प्रहरी पिकेट तैनाथ रहनेछ भने प्रत्येक युनिटबाट मोबाइल तथा पैदल गस्ती खटाइएको छ।

गस्तीका साथै सादा पोशाकका प्रहरी तथा यात्रुवाहक सवारीमा छद्मभेषी प्रहरीमार्फत निगरानी बढाइएको छ। सुरक्षालाई थप चुस्त बनाउन २४ घण्टा सीसीक्यामेरा कन्ट्रोल रुमबाट अनुगमन गरिनेछ भने पूजाआजा र अत्यधिक भीडभाड हुने क्षेत्रमा ड्रोनमार्फत समेत निगरानी गरिने ललितपुर प्रहरीले जनाएको छ।