बाढीपीडितको पुनर्निर्माण र स्थानान्तरणमा बागमती सरकारको जोड: मुख्यमन्त्री किरण थापा

बागमती प्रदेश सरकारले बाढीपहिरो प्रभावित क्षेत्रमा खोज, उद्धार, उपचार र खाद्यान्न सामग्री वितरणको काम सम्पन्न गरिसकेको मुख्यमन्त्री किरण थापाले बताउनुभएको छ। सोमबार सिंहदरबारमा आयोजित विपद् जोखिम न्यूनीकरण तथा व्यवस्थापन राष्ट्रिय परिषद्को २१औँ बैठकपछि उहाँले अब सरकार पुनर्निर्माण र पुनस्थापनाको दिशामा अघि बढ्नुपर्नेमा जोड दिनुभयो।

मुख्यमन्त्री थापाले बाढीका कारण बगरमा परिणत भएका जोखिमयुक्त स्थानमा नभई सुरक्षित र वैकल्पिक स्थानमा नयाँ सहरीकरण गर्नुपर्ने प्रस्ताव राख्नुभएको छ। यसैक्रममा विदुर नगरपालिका-२ स्थित ‘लामिडाँडा’ सामुदायिक वन क्षेत्र बस्न योग्य र सुरक्षित रहेकाले त्यहाँ नयाँ बस्ती बसाल्न सिफारिस गरिने जानकारी दिनुभयो।

उहाँका अनुसार प्रधानमन्त्री वालेन्द्र शाहले विपद् व्यवस्थापनका लागि स्रोत-साधन र जनशक्ति परिचालन गरी छिटोभन्दा छिटो काम सम्पन्न गर्ने प्रतिवद्धता जनाउनुभएको छ। बैठकमा प्रतिपक्षी दलका नेता भीष्मराज आङदेम्बेले राहत वितरणका कानुनी जटिलता फुकाउन सुझाव दिनुभएको थियो।