Ground Zero
September 22, 2026
आगामी मौसमी जोखिमलाई ध्यानमा राख्दै गृहमन्त्री सुधन गुरुङ र ऊर्जा, जलस्रोत तथा सिँचाइमन्त्री विराजभक्त श्रेष्ठले बबरमहलस्थित मौसम पूर्वानुमान महाशाखा पुगेर सम्भावित असरबारे जानकारी लिएका छन्।
बंगालको खाडीमा विकसित न्यूनचापीय प्रणालीका कारण आगामी शुक्रबारदेखि सोमबार (असोज ८ देखि १२ गते) सम्म देशका विभिन्न स्थानमा भारीदेखि अतिभारी वर्षाको सम्भावना रहेको मौसमविद्हरूले जानकारी गराएका छन्।
विपत्बाट हुन सक्ने जोखिम न्यूनीकरण र पूर्वतयारीका लागि जानकारी लिइएको गृहमन्त्री गुरुङले बताए। उनले नदी किनार तथा जोखिमयुक्त क्षेत्रमा टोली परिचालन गरी सतर्कता अपनाउन निर्देशन दिएका छन्।
त्यस्तै, ऊर्जामन्त्री श्रेष्ठले चाडबाडको समयमा कृषि, पर्यटन र यात्रा क्षेत्र प्रभावित हुन सक्ने भन्दै पूर्वसूचना र पूर्वतयारीमा समन्वय भइरहेको बताए। अघिल्ला विपत्बाट पाठ सिक्दै हाइड्रोपावर र विद्युत् प्राधिकरणलाई निरन्तर सूचना प्रवाहको व्यवस्था मिलाइएको तथा उद्धार टोली तयारी अवस्थामा राखिएको उनले जानकारी दिए। मन्त्री श्रेष्ठले यात्रा गर्नुअघि मौसमको जानकारी लिन र सरकारी अलर्ट कडाइका साथ पालना गर्न सर्वसाधारणमा आग्रह गरे।
ग्राउन्ड जीरो यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ।
