जलवायु संकट

प्रमुख प्रतिपक्षी नेपाली कांग्रेसले रसुवामा गएको विनाशकारी बाढीपछिको उद्धार, राहत र पुनर्निर्माणका लागि तत्काल उच्चस्तरीय सर्वदलीय संसदीय समिति गठन गर्न सरकारसँग माग गरेको छ।

कांग्रेस संसदीय दलका नेता भीष्मराज आङ्देम्बेले मंगलबार सभामुख डीपी अर्याललाई भेटेर विपद् व्यवस्थापन र दीर्घकालीन समाधानका लागि संयन्त्र बनाउन ध्यानाकर्षण गराएका हुन्। बाढीलगत्तै सत्तारुढ राष्ट्रिय स्वतन्त्र पार्टीका सभापति रवि लामिछानेले सर्वदलीय संयन्त्रको प्रस्ताव गरे पनि २० दिन बितिसक्दा समेत गठन हुन नसकेको भन्दै प्रतिपक्षले असन्तुष्टि जनाएको छ। भेटमा संसद्‌मा प्रधानमन्त्रीसँगको नियमित प्रश्नोत्तर कार्यक्रमलाई निरन्तरता दिनुपर्ने विषयमा पनि छलफल भएको आङ्देम्बेको सचिवालयले जनाएको छ।

यसैगरी, संयुक्त राष्ट्रसंघको ८१ औँ महासभालाई सम्बोधन गर्ने क्रममा प्रधानमन्त्री बालेन शाहले जलवायु परिवर्तनका असर र चुनौतीबारे विश्व समुदायको गम्भीर ध्यानाकर्षण गराउनुपर्ने विषयमा सभामुख र प्रतिपक्षी नेताबीच सहमति भएको छ। उत्सर्जनमा नगण्य योगदान भए पनि बाढी-पहिरोजस्ता विपद् झेल्नुपरेको भन्दै नेपालले राष्ट्रसंघीय मञ्चबाट जलवायु न्याय, क्षतिपूर्ति र हिमाली क्षेत्रको संरक्षणका लागि अन्तर्राष्ट्रिय सहयोगको जोडदार आह्वान गर्नुपर्ने सुझाव प्रतिपक्षले दिएको छ।