दोलखाको बैतेश्वर गाउँपालिकामा ९८ लाख ९५ हजारको अनियमितता

दोलखाको बैतेश्वर गाउँपालिकामा नियम, कानुन र वित्तीय अनुशासनको ठाडो उल्लङ्घन गर्दै ९८ लाख ९५ हजार ७९३ रुपैयाँको अनियमितता भएको छ भने आवश्यक प्रमाण तथा कागजात नै पेश नगरी ९२ लाख ३४ हजार १३४ रुपैयाँ मनपरी खर्च गरेर राज्य कोषको दोहन गरिएको छ!
स्थानीय तहमा सुशासन र वित्तीय अनुशासनको नारा घन्किइरहँदा दोलखाको बैतेश्वर गाउँपालिकामा भने गैरकानुनी खर्च र बेथितिको सीमा नाघिएको छ। महालेखापरीक्षकको पछिल्लो प्रतिवेदन अनुसार यसवर्ष थपिएको २ करोड ६६ हजारसहित पालिकाको कुल अद्यावधिक बेरुजु २१ करोड ४२ लाख ६५ हजार रुपैयाँ पुगेको छ
कार्यक्षेत्र बाहिर गएर भक्तपुरको सिपाडोलमा घर भाडामा लिई १ लाख ८४ हजारभन्दा बढी रकम भुक्तानी गरियो भने सवारी साधन भाडा र विपद् सामग्री खरिदको रकमसमेत फरक शीर्षकबाट खर्च गरेर २ लाख २९ हजारको नियम विपरीत बजेट उडाइयो।
वडा नम्बर ८ मा स्ट्रक्चरल एनालाइसिस नै नगरी र तीन वटा फरक उपभोक्ता समिति गठन गरेर स्वास्थ्य चौकी भवन निर्माणका नाममा ७६ लाख ८२ हजार रुपैयाँ नियमविपरीत खर्च गरियो।
उमेर हद नाघिसकेका कर्मचारीलाई थप एक वर्ष सेवामा राखी ५ लाख ५६ हजारभन्दा बढी तलब भत्ता बाँडियो भने कानुनी व्यवस्था नै नभएको अनुगमन भत्ताका नाममा २ लाख १२ हजार रुपैयाँ भुक्तानी गरियो।
मापदण्ड अनुसार २५ जनाभन्दा कम विद्यार्थी भएका विद्यालयमा तोकिएभन्दा बढी बालविकास सहजकर्ता राखेर ४ लाख १० हजारको अतिरिक्त व्ययभार पारिएको छ।
यस्तै, शैक्षिक गुणस्तर अनुदानको ५ लाख ७७ हजार रकम अर्कै शीर्षकमा खर्च गरिनुका साथै स्यानिटरी प्याड खरिद शीर्षकबाट कानुन विपरीत गाडी भाडा र खाजामा ४३ हजार रुपैयाँ उडाइयो।
सार्वजनिक खरिद ऐन र वित्तीय उत्तरदायित्वको धज्जी उडाउँदै गरिएको यो मनपरीले बैतेश्वर गाउँपालिकामा सुशासनको गम्भीर धज्जी उडाएको छ।