बागलुङको जैमिनी नगरपालिकामा १ करोड ११ लाखको अनियमितता

गण्डकी प्रदेश अन्तर्गत बागलुङको जैमिनी नगरपालिकामा नियम, कानुन र वित्तीय अनुशासनको धज्जी उडाउँदै १ करोड ११ लाख २७ हजार ३९९ रुपैयाँको व्यापक अनियमितता भएको छ भने आवश्यक प्रमाण तथा कागजात नै पेश नगरी १ करोड २६ लाख २ हजार ७९४ रुपैयाँ मनपरी खर्च गरेर राज्य कोषको दोहन गरिएको छ !
स्थानीय सरकारमा सुशासन र वित्तीय अनुशासनको नारा घन्किइरहँदा बागलुङको जैमिनी नगरपालिकामा भने बेथिति र गैरकानुनी खर्चको सीमा नाघिएको छ। महालेखापरीक्षकको पछिल्लो प्रतिवेदन अनुसार यसवर्षको थपिएसँगै पालिकाको कुल अद्यावधिक बेरुजु १३ करोड ८० लाख ४५ हजार रुपैयाँ पुगेको छ।
मात्र ७ वर्षका लागि भाडामा लिइएको व्यक्तिको जग्गामा ५ वर्ष मात्र उपयोग गर्न पाउने गरी १६ लाख ७१ हजारभन्दा बढी खर्च गरेर दीर्घकालीन ट्रस र आरसीसी सभाहल निर्माण गरियो, जुन पालिकाको अनुत्पादक खर्च ठहरिएको छ।
त्यस्तै, २५ वटा उपभोक्ता समितिका योजनाहरूमा शतप्रतिशत हेभी इक्विपमेन्ट प्रयोग गरी गैर-बैंकिङ माध्यमबाट भाडा भुक्तानी गरेर ५९ लाख ४१ हजार रुपैयाँ नियमविपरीत निकासा गरियो।
ओ एण्ड एम सर्भे नगरी र स्थायी दरबन्दी नै नभएका स्वास्थ्य सेवाका अनमी, अहेव र कार्यालय सहयोगी लगायतका पदमा मनपरी करारमा राखी २५ लाख ४० हजारभन्दा बढी बजेट उडाइयो।
यति मात्र होइन, पालिकाका कर्मचारी नै नरहेका विवादका सहजकर्ता मेलमिलापकर्ताहरूलाई बिना कुनै कार्यविधि र कानुनी आधार सञ्चार सुविधाका नाममा ७४ हजारभन्दा बढी रुपैयाँ बाँडियो।
स्वास्थ्य संस्थाका लागि प्रयोग हुने प्रणालीको नवीकरण र सर्भर सुरक्षाका नाममा बिना कुनै प्रगति प्रतिवेदन ७३ हजारभन्दा बढी खर्च लेखियो।
किसानलाई तरकारी बीउ वितरण गर्दा गुणस्तर र परिमाण नै नखुलाई ५ लाख ९७ हजार रुपैयाँ भुक्तानी गरिनुका साथै प्रत्यक्ष उपभोक्ता सहभागी नहुने वडा कार्यालयको घडेरी निर्माणमा समेत उपभोक्ता समिति बनाएर २ लाख २७ हजार सुम्पियो।
सार्वजनिक खरिद ऐन र वित्तीय उत्तरदायित्वको धज्जी उडाउँदै गरिएको यो मनपरीले जैमिनी नगरपालिकामा सुशासनको गम्भीर धज्जी उडाएको छ।