उद्धारमा ढिलासुस्ती

श्रम संस्कृति पार्टीका प्रमुख सचेतक आरेन राईले रसुवाको भोटेकोशी बाढीपछि सरकारले खोज, उद्धार र राहतमा प्रभावकारी काम गर्न नसकेको आरोप लगाएका छन्।

प्रतिनिधि सभाको मङ्गलबारको बैठकमा बोल्दै उनले रसुवालगायत बाढी प्रभावित क्षेत्रमा पर्याप्त सुरक्षाकर्मी र विज्ञ परिचालन नभएको बताए। हाकुबेसीस्थित सुरुङमा करिब ३०० जना बेपत्ता हुँदा जम्मा २० जना उद्धारकर्मी मात्रै खटाइएको तथा चिलिमे हाइड्रोपावर क्षेत्रमा पनि ६ देखि ८ जना बेपत्ता रहेको उनले जानकारी दिए।

सरकारको कमजोरीका कारण बचाउन सकिने नागरिकको समेत अकालमा ज्यान गएको दाबी गर्दै उनले खोज र राहत कार्यलाई तत्काल थप प्रभावकारी बनाउन ध्यानाकर्षण गराएका छन्।