दैलेखको चामुण्डा विन्द्रसैनी नगरपालिकामा २ करोड ५५ लाखको अनियमितता

दैलेख जिल्लाको चामुण्डा विन्द्रसैनी नगरपालिकामा २ करोड ५५ लाख ६४ हजार ८ सय १३ रुपैयाँको अनियमितता भएको छ भने प्रमाण तथा कागजात नै पेश नगरेर ४ करोड ३४ लाख ५० हजार ५ सय ५४ रुपैयाँ झ्वाम पारेका छन् ।

महालेखा परीक्षकको लेखापरीक्षण प्रतिवेदन अनुसार अघिल्लो वर्षको बेरुजुमा यस वर्ष ९ करोड १२ लाख २९ हजार रुपैयाँ थपिएपछि कुल अद्यावधिक बेरुजु ४७ करोड ४१ लाख ४६ हजार रुपैयाँ पुगेको छ।

नगरपालिकाको १ अर्ब ८ करोड रुपैयाँको कुल आय-व्यय परीक्षण गर्दा कानुन र खरिद नियमावलीको धज्जी उडाएको पाइएको छ। स्थानीय सरकार सञ्चालन ऐन विपरीत कानुन अधिकृत, कम्प्युटर अपरेटर र प्राविधिकलगायत दरबन्दी नभएका पदमा करार तथा ज्यालादारी राखेर ८४ लाख २७ हजार र समग्रमा करार कर्मचारीका नाममा २ करोड ४६ लाख रुपैयाँभन्दा बढी खर्च गरिएको छ।

सडक निर्माणमा सडक विभागको नर्म्सविपरीत लागत अनुमानमा फेरबदल गरी ९ लाख २३ हजार रुपैयाँ थप व्ययभार पारेर भुक्तानी दिइएको छ। त्यस्तै, प्रतिस्पर्धाबिना र नियम विपरीत १९ लाख ७५ हजार रुपैयाँका मोटरसाइकल खरिद गरिएको छ भने अघिल्लो आर्थिक वर्षको ७ लाख ५२ हजार रुपैयाँ मोटरसाइकलको बाँकी बक्यौता गैरकानुनी रूपमा भुक्तानी गरिएको छ।

वोलपत्रको माध्यमबाट गर्नुपर्ने कामहरूमा नियम मिचेर ८८ लाख ९१ हजार रुपैयाँको काम पटक-पटक कोटेशनमार्फत सोझै खरिद गरिएको छ। नदीजन्य पदार्थको बिक्रीमा प्रदेश सरकारले तोकेको दरभन्दा कम दर कायम गरी राजस्व चुहावट गरिएको छ।

दलित लक्षित कार्यक्रमका नाममा कार्यपालिका सदस्यलाई १ लाख ५० हजार रुपैयाँ सोझै दिएर नियमविपरीत खर्च गराइएको छ भने नाफामूलक सहकारी र फर्महरूलाई ७ लाख ३६ हजार रुपैयाँ अनुदान बाँडिएको छ।

वन हेरालु, माली र ज्यालादारी कर्मचारीका नाममा १४ लाख १४ हजार रुपैयाँ र प्राविधिक कर्मचारीलाई गैरकानुनी रूपमा ६ लाख ८४ हजार रुपैयाँ फिल्ड भत्ता बाँडिएको छ। सवारीसाधनको समयमा नवीकरण नगर्दा जरिवानाबापत थप आर्थिक भार पार्नेदेखि गाउँपालिकाको कोषबाट मनपरी ढङ्गले कागजातबिनै बजेट सिध्याउने क्रम रोकिएको छैन।