भक्तपुरको मध्यपुर थिमि नगरपालिकामा १ करोड ३४ लाखको अनियमितता

भक्तपुरको मध्यपुर थिमि नगरपालिकामा नियम र कानुनको ठाडो उल्लङ्घन गर्दै १ करोड ३४ लाख ९६ हजार ६०९ रुपैयाँको व्यापक अनियमितता भएको छ भने आवश्यक प्रमाण तथा कागजात नै पेश नगरी ८६ लाख २१ हजार ४६५ रुपैयाँ मनपरी खर्च गरेर राज्य कोषको दोहन गरिएको छ !
महालेखापरीक्षकको पछिल्लो प्रतिवेदन अनुसार पालिकामा यसवर्षको ४ करोड ८ लाख थपिएसँगै कुल अद्यावधिक बेरुजु २४ करोड २ लाख २७ हजार ९५५ रुपैयाँ पुगेको छ।
नियम अनुसार १ करोडसम्मको स्थानीय निर्माण कार्य मात्र उपभोक्ता समितिमार्फत गराउन पाइन्छ। तर, सर्वसाधारण र देशैभरका मानिसले सेवा लिने प्रहरी कार्यालय तथा नेपाल कोरिया मैत्री अस्पतालको भवन रंगरोगन र मिटिङ हल निर्माणको ६५ लाख ४६ हजारभन्दा बढीको काम कानुन छलेर उपभोक्ता समितिलाई सुम्पियो।
यति मात्र होइन, १ करोडभन्दा बढी लागत अनुमान भएका शंखधर पार्क, नगदेश लायकु दरबार र बसिपखु संग्रहालय जस्ता ठूला आयोजनासमेत बोलपत्र आह्वान नगरी सोझै उपभोक्ता समितिमार्फत गराएर ६० लाख १० हजारभन्दा बढी रकम अनियमित तरिकाले भुक्तानी गरियो।
गठ्ठाघर-महादेवस्थान सडक निर्माणमा सम्झौता अनुसार कामै नगरी ८३ प्रतिशत मात्रै काम सक्दा पनि निर्माण व्यवसायीलाई कारबाही गर्नुको साटो ४ लाख ९२ हजारको भुक्तानी स्वीकृत गरियो।
संघीय सरकारको गृह मन्त्रालय अन्तर्गत पर्ने नेपाल प्रहरी र सशस्त्र प्रहरीका गाडी मर्मतका नाममा पालिकाको कोषबाट नियमविपरीत ४ लाख ४४ हजारभन्दा बढी बजेट उडाइयो।
बजेट र पेस्की उपलब्ध हुँदाहुँदै समयमै सवारी साधन नवीकरण नगरेर कमेरेटार आयोजनाले जनताको करबाट जरिवानासमेत तिरेको पाइएको छ।
सार्वजनिक खरिद ऐन र वित्तीय उत्तरदायित्वको धज्जी उडाउँदै गरिएको यो मनपरीले मध्यपुर थिमिमा सुशासनको गम्भीर धज्जी उडाएको छ।