जितपुरसिमरा उपमहानगरपालिकामा ३ करोड ३६ लाखको अनियमितता

मधेश प्रदेशको जितपुरसिमरा उपमहानगरपालिका बारामा ३ करोड ३६ लाख ९४ हजार २ सय ७२ रुपैयाँ अनियमितता भएको छ भने आवश्यक प्रमाण तथा कागजात नै पेस नगरी ५ करोड ९३ लाख ९३ हजार ५ सय ३२ रुपैयाँ खर्च गरिएको पाइएको छ। महालेखा परीक्षकको लेखापरीक्षण प्रतिवेदन अनुसार अघिल्लो वर्षको बेरुजु फछ्र्योटपछि कायम बेरुजुमा यस वर्षको १३ करोड ३ लाख २५ हजार ८ सय ५३ रुपैयाँ थपिएर कुल अद्यावधिक बेरुजु १ अर्ब १ करोड ८० लाख ६६ हजार ५ सय ७२ रुपैयाँ पुगेको छ।

उपमहानगरपालिकाको ३ अर्ब ८९ करोड ५८ लाख रुपैयाँको कुल आय-व्यय परीक्षण गर्दा करोडौँको प्राविधिक तथा प्रशासनिक बेथिति सार्वजनिक भएको छ। हात्तीसार-मथुरापुर र जितपुर-बडहर्वा सडक कालोपत्रे योजनामा डिपिआरको वास्तविक लम्बाइभन्दा बढी नाप देखाएर क्रमशः १ करोड ७५ लाख र १ करोड ५७ लाख रुपैयाँको त्रुटिपूर्ण लागत अनुमान तयार गरी ठेक्का आह्वान गरिएको पाइएको छ।

पदाधिकारी र कर्मचारीको नियमित जिम्मेवारीभित्र पर्ने धान, गहुँ र गाईभैँसी पकेट कार्यक्रमको अनुगमनका नाममा २ लाख ५३ हजार रुपैयाँ नियमविपरीत भत्ता बाँडिएको छ। डुमरवाना फर्ममा ११ जनाले ३ दिन अनुगमन गरेको औचित्यहीन बिलसमेत पेस गरिएको छ।

त्यस्तै, फर्म वा सप्लायर्सलाई सिधै खातामा दिनुपर्ने रकम कर्मचारीको नाममा सोधभर्ना दिइने गरिएको छ भने रोजगार संयोजकलाई मापदण्डविपरीत गैरकानुनी रूपमा मोबाइल रिचार्ज खर्च दिइएको छ।

सार्वजनिक खरिद ऐनको उल्लङ्घन, पूर्वाधार निर्माणमा कागजी लम्बाइ बढाउने दाउपेच र अनुगमन भत्ताका नाममा भएको यो मनपरीले स्थानीय सरकारमा वित्तीय अनुशासनको गम्भीर धज्जी उडाएको छ।