संसदीय दलकी उपनेता पद्मा अर्यालको माग: सांसद सुनार अडियो प्रकरणको संसदीय छानबिन हुनुपर्छ

नेकपा एमाले संसदीय दलकी उपनेता पद्माकुमारी अर्यालले राष्ट्रिय स्वतन्त्र पार्टी (रास्वपा) का सांसद खगेन्द्र सुनार जोडिएको अडियो प्रकरणप्रति गम्भीर आपत्ति जनाउँदै संसदीय छानबिनको माग गर्नुभएको छ ।

मंगलबार सिंहदरबारमा सञ्चारकर्मीहरूसँग कुरा गर्दै अर्यालले यो विषय सम्बन्धित राजनीतिक दलको मात्र नभई संसदकै दायराभित्र पर्ने भएकाले संसदबाटै गम्भीरतापूर्वक छानबिन हुनुपर्ने बताउनुभयो ।

छानबिनका क्रममा दोषी ठहरिएमा कानुन अनुसार कडाभन्दा कडा कारबाही गरिनुपर्ने उहाँको भनाइ छ । सार्वजनिक पदमा रहेका व्यक्तिहरू निश्चित मर्यादा, आचरण र जवाफदेहिताभित्र रहेर जनताको सेवकका रूपमा प्रस्तुत हुनुपर्नेमा उहाँले जोड दिनुभयो ।

साथै, पद र शक्तिको दुरुपयोग गरेर अरूमाथि अवाञ्छित गतिविधि गर्ने छुट कसैलाई पनि नभएको अर्यालले स्पष्ट पार्नुभयो ।